Leviticus 6
1UJehova wathi kuMosi: 2“Aluba umuntu esona njalo engathembeki kuJehova ngokukhohlisa umakhelwana wakhe ngalokho ayabe ekuphathisiwe loba ayabe ekugcinisiwe loba okuyabe kuntshontshiwe, loba nxa edlelezela omunye, 3loba nxa ethola obekulahlekile kodwa aqambe amanga ngakho, loba nxa efunga ngokungamanga, loba nxa esenza loba yisiphi isono esingenziwa ngabantu – 4nxa esona kanjalo abe ngolecala, kumele abuyisele lokho ayabe ekuntshontshile loba ayabe ekuthethe ngodlakela, loba ayabe ekade ekuphathisiwe, loba obekulahlekile wasekuthola, 5loba yingabe yini ayabe efunge ngayo ngokwamanga kumele ahlawule ngokugcweleyo, engeze ngokukodwa kokuhlanu kukho njalo akuphe umnikazi konke mhla evuma icala lakhe. 6Ukuhlawula icala kumele alethe kumphristi ozakusa kuJehova, umnikelo wakhe wesono, inqama esuka emhlambini, ingelasici njalo elingeneyo ngemfanelo. 7Ngalokho umphristi uzamenzela indlela yokubuyisana phambi kuka Jehova, njalo uzathethelelwa ngalezi izinto azenzileyo ezimenze waba lecala.Umnikelo wokutshiswa
8UJehova wathi kuMosi: 9“Phana u-Aroni kanye lamadodana akhe umlayo lo: Le yimithetho yomnikelo wokutshiswa: Umnikelo wokutshiswa kufanele usale eziko le-alithare ubusuku bonke, kuze kuse, lomlilo kufanele ubhebhe njalonje e-alithareni. 10Umphristi uzagqoka-ke izigqoko zakhe zelineni, kuthi ezangaphansi zibe ngezelineni, abesekhupha umlotha womnikelo wokutshiswa oyabe usutshiswe ngumlilo e-alithareni awufake eceleni kwe-alithare. 11Abesezikhumula lezi zigqoko afake ezinye, athwale umlotha awukhuphele phandle kwezihonqo endaweni ehlambulukileyo. 12Umlilo ose-alithareni kufanele ubhebhe njalonje; akumelanga ucitshe. Insuku zonke ekuseni umphristi kumele engeze inkuni akhwezele alungise kuhle umnikelo wokutshiswa emlilweni e-alithareni, atshise amahwahwa omnikelo wobudlelwano kulo i-alithare. 13Umlilo kumele ubhebhe njalonje e-alithareni; akumelanga ucitshe.Umnikelo wamabele
14“ ‘Le yimithetho ephathelene lomnikelo wamabele okufanele amadodana ka-Aroni awulethe kuJehova, phambi kwe-alithare. 15Umphristi kufanele acuphe ifulawa elicolekileyo kanye lamafutha, kanye lempepha yonke yomnikelo wamabele, besekutshiswa ingxenye yesikhumbuzo e-alithareni ibe lephunga elimnandi kuJehova. 16U-Aroni kanye lamadodana akhe bazakudla okuseleyo, kodwa kumele kudliwe kungela mvubelo endaweni engcwele; bakudlele egumeni leThente lokuHlanganela. 17Akumelanga kubhakwe kulemvubelo. Ngibanika khona njengesabelo sabo seminikelo eyenziwa kimi ngomlilo. Kungcwele njengomnikelo wesono lomnikelo wecala. 18Bonke abesilisa enzalweni ka-Aroni bangakudla, kube yisabelo sabo kokuphela esizukulwaneni esizayo, okubathintayo kuzakuba ngcwele.’ ” 19UJehova wakhuluma njalo kuMosi wathi, 20“Lo ngumnikelo ozanikelwa ngu-Aroni kanye lamadodana akhe kuJehova ngelanga azagcotshwa ngalo. Kuzakuba yingxenye yokukodwa kokulitshumi kwehefa yefulawa elicolekileyo kube ngumnikelo wamabele owansuku zonke, ingxenye yawo ibe sekuseni enye ingxenye ibe kusihlwa. 21Kulungise ngamafutha emganwini wensimbi oyingubhe; kulethe kuhlanganisiwe kuhle ube ususethula umnikelo wamabele wenziwe incezwana ube lephunga elimnandi kuJehova. 22Indodana egcotshelwe ukuthatha isikhundla sikaAroni njengomphristi yiyo ezalungisa lokho. Kuyisabelo sikaJehova sansuku zonke njalo kufanele kutshiswe ngokupheleleyo. 23Yonke iminikelo yamabele yomphristi izatshiswa iphele; akumelanga idliwe.”Umnikelo wesono
24UJehova wathi kuMosi, 25“Tshono lokhu ku-Aroni lamadodana akhe: ‘Le yimithetho yomnikelo wesono: Umnikelo wesono kufanele uhlatshwe phambi kuka Jehova endaweni lapho umnikelo wokutshiswa ohlatshelwa khona. Ungcwele kakhulu. 26Umphristi owunikelayo uzawudla; kawudlelwe endaweni engcwele egumeni leThente lokuHlanganela. 27Konke okuthinta inyama leyo kuyakuba ngcwele. 28Imbiza yebumba okuphekwe ngayo inyama kumele ibulawe; kodwa nxa iphekwe ngembiza yethusi, imbiza kufanele iphalwe ihlanjululwe ngamanzi. 29Wonke owesilisa emulini yomphristi, ungcwele kakhulu. 30Kodwa loba yiwuphi umnikelo wesono okulethwa igazi lawo eThenteni lokuHlanganela ukwenza ukubuyisana eNdaweni eNgcwele kawungadliwa kumele utshiswe.
Copyright information for
NdeIBE